كيف تكون فري لانسر ناجح
الثقة
من وجهك نظرك كفريلانسر الموضوع ممكن ميكونش مهم بشكل كبير أو على الأقل مش بنفس أهمية تركيزك على جودة شغلك وتطويرها، بس من وجهة نظر العميل الثقة بتيجي الأول وهي الأهم، لو فكرت فعلياً ممكن تكتشف إن السبب الحقيقي ورا أغلب العملاء اللي اتعاملوا معاك من البداية هو أنهم وثقوا فيك أو وحتى وثقوا في جودة شغلك مش مجرد عجبهم.
وعلشان أأكدلك أكتر أهمية الثقة من كام يوم كنت في مكاملة مع عميل وقالي بالنص “بص يا علي إحنا شغلنا كويس علشان اللي أنت بتطلبه انا بنفذه وانا واثق فيك وفي تفكيرك” الجدير بالذكر إننا بنتعامل مع بعض لمدة سنة وشبه مش بنتكلم إلا بمعدل ربع ساعة شهرياً أو أقل، انا بعمل شغلي وهو بيدفع مقابله من غير أي تدخلات أو مكالمات كتير أو حتي تعديلات.
وأعتقد السبب هنا أوضح ما يكون وهو “الثقة”، لو انت جودة شغلك عالية جداً فا دا مش كفاية علشان تنجح كفريلانسر لأن في حرفياً ملايين شغلهم بنفس جودة شغلك ويمكن أفضل، دي حاجة سهل العميل يوصلها، باختصار شديد لو جودة شغلك هتخليك تعمل تاسك لعميل فا ثقته فيك هتخليه يشتغل معاك لسنين أطول.
طيب أنت عمال تتكلم عن الثقة وإنها أهم حاجة في علاقتك مع العميل، إزاي أقدر أكون رابط ثقة قوي بيني وبين العميل؟
دا سؤال مهم، وإجابته بتبدأ من اختيارك للعميل نفسه، ودا الحقيقية من أفضل المميزات في كونك فريلانسر، هو إنك برضه بتقيم العملاء وبتختار تتعامل مع مين ومتتعاملش مع مين، علشان تعرف إيه أفضل عميل ليك لازم الأول تبدأ تحدد انت نفسك أولوياتك في العميل والأهم تحدد مبادئك الشخصية اللي مينفعش تتنازل عنها، على سبيل المثال انا من مبادئي الشخصية في علاقي مع العملاء:
التفاهم لأنه أساس أي علاقة ناجحة.
الخبرة، بنسبة كبيرة برفض التعامل مع الـ Startups (ومقصدش أي إهانة) بس لأن التعامل بيكون قائم على الطموح ودا غالباً صعب تبني عليه علاقة قوية وطويلة على العكس بفضل التعامل مع الـ Business Owners لأن بيكون عندهم خبرة كافية وفهم أوضح وأبعد ودا بيسهل كتير.
وهكذا, لما تحدد مبادئك الشخصية في اختيار والتعامل مع العملاء والأهم تطبقها على نفسك ومتتنازلش عنها تماماً ساعتها هتقدر تتعامل مع العملاء الأنسب ليك واللي فيه بينكم مساحة ثقة وتفاهم كافية وساعتها هتقدر بسهولة تكون علاقة ناجحة وطويلة معاهم، دي حاجة هيتم مناقشتها في مقال منفصل، بس حالياً كل النصيحة اللي أقدر اقدمهالك هي إنك تتجنب تماماً العميل المتردد أو اللي مش عارف هو عايز إيه لأن عملية إرضائه هتكون أصعب ما يمكن وبنسبة كبيرة هتكون تجربة سيئة بالنسبالك.
طيب أنت قولت في أول المقال إن الجودة بتيجي في المرتبة التالتة من وجهة نظر العميل، إيه تاني حاجة بعد الثقة؟ تاني أهم أولوية للعميل بعد الثقة هي الالتزام، لو اعتبرنا إن الثقة هي السفينة اللي بتحدد اتجاه شغلك مع عملائك، الالتزام هيكون بمثابة القبطان واللي من غيره السفينة مش هتتحرك خطوة.
وللحديث بقية
تعليقات
إرسال تعليق